來佬餐館 (已搬遷) 新店位置

寻日星期五Happy Friday，几个同事谂住去老兰饮杯野轻松下，Charmaine提议去食点心，我以为某某餐厅有新野出，原来佢讲紧来佬餐馆，未试过，都可以试下！去到来佬，人不是太多，店员安排我地坐地下果层。我好钟意来佬既装修，好有屋企感觉。睇餐牌，我地三个女仔样样都想试，但一笼点心都要三四十蚊，好贵，我地唯有就住嗌，叫左萝卜糕，黑松露上素饺、菠菜饺、春卷、凤爪、叉烧肠粉、麻辣饺同埋个名好特别既”虫草花鲜竹卷” (其实都叫左几多，嘿嘿) 。我地最欣赏饺的质素，皮薄而且足料，唔似一般酒楼咁。同个职员倾开计，佢仲话真系入货自己包自己做，即叫即蒸。我地心谂，难怪咁贵。讲真，三十几蚊一碟点心，都几肉赤，不过要在宵夜时段食到有质素既点心，都唔系到到有，所以我地话一个月先食一次。特别推介︰来佬菠菜饺又真系几好味，因为里面真系啖啖鲜菠菜，仲有未见过全绿色的饺子，好特别，赞！意见︰价钱有少许贵，胜在层数多，不太嘈，可以好好咁倾下计，饮杯茶，食个包。