薩莉亞意式餐廳 (莊士倫敦廣場)

营业中

休息中

我唔太中意帮衬萨利亚，份量太少!普通一个餐都好似儿童餐，同好耐无见嘅师妹明示暗示过，佢都仍然话要落萨利亚，咁无办法啦! 鬼叫我顺德人咩! 结果去伦敦广场食住等.早两日去完意粉屋，今次帮衬萨利亚，感觉好似来回天堂与地狱，周旋于魔鬼同天使之间!地狱魔鬼系因为除咗份量少之外，质素亦唔理想.三个人点咗甜虾沙律，8只原味鸡翼，蘑菇忌廉汤，芝士薯蓉，蒜香法包，蒜汁烧鱿鱼，八爪鱼须，西兰花，野菌忌廉粗管面，白汁烟肉薯仔 pizza.甜虾沙律简直惨不忍睹，D虾细只到食唔出甜味，虾干都仲大只过佢，捉到D咁细只嘅虾仔好心就放咗佢咪攞嚟食啦!野菌忌廉粗管面忌廉汁不足而唔够热，而白汁烟肉薯仔 pizza 饼底有D烟韧，唔系我中意嘅脆口感，再加上唔够热，芝士味都变得无味.天使之手又从地狱慢慢拉翻我上天堂，蘑菇忌廉汤够浓郁，蒜汁烧鱿鱼弹牙之余一D都唔韧，蒜汁味道带甜惹味，唔辣嘅原味鸡翼偏甜又入味，水准之作.再睇埋张单，无加一之余三个人都只系食咗二百几蚊，价钱系意粉屋一半都唔只! 一比之下，意粉屋即刻变成无间地狱!另外，萨利亚有个优点，份量唔多，可以点多几款食物!满分俾唔落手，俾个 okay 吧!