博多·爐端燒

营业中

休息中

今次嚟到依间由日本师傅主理嘅炉端烧，一尝博多风味嘅日本料理😋丰盛嘅一餐由前菜开始－前菜都系师傅嘅家乡小菜，又叫万菜，食炉端烧时都会点几碟边食边等师傅烧，所以多数都系冷盘嚟。印象深刻嘅有口感味道都好似cream cheese嘅芝士豆腐，又滑又开胃嘅蒟蒻，仲有第一次食嘅鬼爪螺！蒲烧鳗鱼系令我地最惊艳嘅烧物－鳗鱼皮脆肉嫩，外层脆卜卜但同时亦能够锁住鳗鱼本身嘅油香同鲜味，点啲鳗鱼汁味道更浓厚。烧蚝非常鲜甜，烧嘅时间掌握得好好，蚝肉唔干身，食落依然鲜嫩多汁。手羽先一夜干用到福岗嘅鸡翼，特别大只，风干腌一晚所以好入味，鸡皮烧至好靓嘅金黄色，唧少少柠檬汁味道更提升。日本白粟米好清甜，烧过后特别香，好想食晒成条呢！烧饭团有唔同口味拣，辛味噌够惹味，芝士好香但较腻；饭团外面烧得焦香，好似有层香脆嘅外壳咁，入面嘅饭就软绵黏口，配埋紫菜食口感丰富。最后当然唔少得日式甜品－天神布甸系焦糖布甸嚟，淋上焦糖酱食到满满嘅幸福感，可以试试点海盐变成海盐焦糖依个微妙嘅组合；星野村布甸就系焙茶布甸，同红豆蓉好夹，怕甜嘅都啱食。