源興茶檔 (已結業)

上环街市熟食市场系区内上班族嘅穷人饭堂，价廉物美，食得你饱，又唔使太贵，识揾食仲可以揾到啲好好味嘅嘢食。除咗出晒名𠮶啲之外(我反而好少食)，仲有好多都系卧虎藏龙。啱啱先同朋友讲起喺上环好难揾一间蛋治煮得好食嘅茶记，点知今日就咁岩嚟咗呢度。叫咗件蛋牛治，实在系区内食过觉得最好食嘅 (因为本来最好食𠮶间蛇窦已经冇咗，变咗呢度系最好食)。首先系块面包，𠮶种柔软程度，如果你唔话俾我听呢度系上环街市熟食中心，我以为自己去咗啲日式洋食店食三文治，因为𠮶块面包嘅质感，实在就系日式方包一样咁软滑！炒蛋恰到好处，大概就系七成熟，配埋碎牛，超正！入口无论由面包去到鸡蛋再去到碎牛，都系差不多嘅软滑质感，成件蛋治就融为一体，好掂！而且师傅好窝心，整件蛋治一开四，食起嚟好方便！唔系好够皮，叫多碟意粉，见到有红肠，二话不说就叫个煎蛋红肠意粉，而家去茶记想揾红肠食真系硕果仅存！煎蛋好够火候，啱啱好起焦有㶶边索埋d豉油汁系一绝够惹味，而中间蛋黄仍然系半生熟有蛋汁，捞落意粉度食真系童年回忆返晒黎！今次食住呢两样先。