韓閣 (已搬遷) 新店位置

早个排食咗好多餐日本嘢，今日就想转下口味食韩国嘢。讲起韩国嘢餐厅，好多人都会即刻谂起尖沙咀𠮶条韩国街，但其实只要搜寻一下，每一区都应该会有好嘅韩国餐厅。今日就去咗荃湾路德围运通街嘅“韩阁“食韩国嘢。本人系韩国炸鸡嘅头号粉丝 ，今次就叫咗三重芝士炸鸡 $108，上枱已经见到有唔同嘅芝士铺满炸鸡上面， 咬一啖，啖啖肉，非常之juicy， 而且有劲多嘅芝士，可以拉丝添，虽然邪恶但系都十分值得。食韩国嘢又点少得部队锅 $88 ，呢个部队锅性价比十分高。我哋嗌咗小辣， 辣度对我嚟讲啱啱好。而且十分足料，有好多牛肉同埋五花腩肉，韩式 年糕口感烟韧弹牙。另外仲嗌咗个泡菜猪肉饭卷 $46， 酸酸辣辣嘅泡菜味十分醒胃，仲有鸡蛋同芝士等， 唔好睇佢细细件，但其实都好饱肚 。餐厅嘅头盘做特价十分抵食，我哋点咗韩国饺子 $15 以及炸野菜春卷 $15。 啱啱炸起热辣辣上枱， 脆卜卜嘅饺子配入韩国粉丝等馅料 ，别有一番风味 。餐厅虽小但餐牌嘅选择甚多，而且餐厅仲唔收加一 。见到佢个餐牌有个韩国无骨猪手，卖相十分吸引，下次一定要去试。