Sky726

果然「人」如其名，Sky726位于旺角闹市中25楼，一入到去就被落地大玻璃吸引，可以俯瞰市区。靓景要配美食。Brunch选择多，同bff选择咗海鲜意大利饭，同炸鸡窝夫三文治。跟餐好抵，有汤、餐包同埋饮品。餐汤有意大利菜汤，有好多蔬菜。海鲜意大利饭好浓鲜虾味，鲜味咸味配合得好好。意大利饭唔会煮得过淋。海鲜好足料，有鱿鱼、大虾、青口，亦都有好多杂菌。口感层次十足。炸鸡窝夫三文治啱啱好切咗两件，方便share食。窝夫夹杂炸鸡，仲有蕃茄同埋生菜。窝夫甜甜地，配合炸鸡嘅咸咸地，又几夹。口感上，窝夫比较脆身。而炸鸡仍然做到嫩口，有肉汁。是日甜品系朱古力蛋糕，口感似brownie，味道浓郁。喺星期六望住靓景，享受一个靓嘅brunch，系一大乐事。