篤篤車 (已搬遷) 新店位置

呢間麵店最大特色相信係湯底，冬陰功係普通泰國菜館都容易食到，但鱷魚湯真係好少見，好有興趣知佢咩味...從出面個menu，見到除o左呢d 特式湯底外，佢都仲有正常車仔麵既清湯或者牛腩湯揀既。我lunch time 黎食，可能餐廳位於學校區，超多學生幫襯，店員一時都應接不暇，只可叫外面等緊既人攞住張點菜紙點住先。呢個都唔係問題，問題係佢無派籌，有人打尖一見人出就攝左入去，但個侍應女仔都唔理，感覺其實不太好。$35 有三款餸，係ok 抵的，尤其有埋特色湯。試左佢主打既鱷魚湯，湯底幼滑鮮甜，仲落左d 紅棗杞子藥材去煲，補氣補身，係果真唔錯既配搭。食完個麵，都仲可飲多兩啖，唔會話好鹹好口喝咁。冷熱飲都係加$7，咁天氣咁熱梗係叫凍。另外我見到對面個學生妹叫左個春卷，好似都炸得幾甘香，下次可試埋既～希望到時入座安排會好一點。