La Postre (厚福街) (已結業)

今晚黎到位于尖沙咀厚福街的一间西班牙菜餐厅，La Postre~门面系我最钟意的天蓝色，好钟意~我地book 左7:00pm, 初头都仲有好多位，但好快就full了，店员好有礼貌，又会自动自觉帮我地加水，好体贴。食物我地叫左︰蜜瓜黑毛猪 (24个月)，谂住系小食，但一D都唔少，超级大份。4大块黑毛猪盖著超长超大条又青绿的蜜瓜，黑毛猪薄切唔咸，有甘味，蜜瓜鲜甜多汁，夹埋一齐食系好清新又唔腻的小食~主菜叫左一个二人份量的牛仔蚝肉炖饭，但一上枱我觉得似4人份量多D，超级大同超级多，牛仔又软又冧，仲好入味，蚝肉唔系蚝仔粥果D细细粒，而系都有生蚝咁大咁厚身，饭亦多汁，连埋洋葱果D配料，好惹味，不过真系太多！甜品叫左什果麻糬窝夫，杂果有橙、无花果、奇异果、蓝莓、士多啤梨等，窝夫热辣辣，好脆，里面夹著烟烟韧韧的麻糬，仲有一粒雪糕球，系一个唔会好甜又有口感的甜品。整体系一间好有质素的餐厅~