Mamaday (已結業)

Mamaday係一間人氣打卡搞怪cafe，之前已經食過尖沙咀店，唔係得個樣打卡，野食真心唔錯，所以今次過開黎附近staycation，check out後就喺度食埋lunch先返屋企。留意，Mamaday就算平日都好多人，加上銅鑼灣店比尖沙咀店細，座位唔算太多，所以一定要預先訂座。邊個先係真正門口，都要望多兩眼先知。店內貫徹搞怪風格，不過由於店面冇尖沙咀店咁大，所以打卡位都冇咁多。Chocolate Latte($48) - Menu介紹係用73.5%朱古力，朱味真係幾濃，飲倒少少朱古力渣，朱迷一定滿意。Not-too-sweet Matcha Frappe($48) - 綠茶沙冰打得夠滑，唔會飲倒冰碎，唔單止唔會太甜，仲好濃綠茶味，甘甘地又唔會有苦澀味。明太子薯條(45/小) - 份量冇尖沙咀店咁多，我諗都有少左1/3，不過兩個人食都夠食。薯條連住少少脆皮，脆得黎有少少咬口，點埋個明太子，鹹鹹香香食到停唔倒口。軟殼蟹批薩($138) - 上次喺尖沙咀店都有叫，一樣咁好食。Pizza上面有原隻軟殼蟹，另外仲有薯蓉、菠蘿、千島醬同蜜糖，所以食落會有少少甜味都幾好食，餅底係薄底，餅邊幾脆。