元洲牛肉麵 (青華閣) (已結業)

呢轮成日喺社交平台关注组见到元洲牛肉面个名，老老实实，自从强记冇咗，我一向唔多喺街尾揾食，所以都未食过元洲，但有人话佢系长沙湾最靓牛腩。咁劲？真系要亲自一试啰。早两晚行过嚟想试下，居然摸门钉，今次再嚟，有开。仲居然有传闻中好早卖晒啲红烧牛肉。红烧牛肉名不虚传，厚肉、肉嫩、筋腍，入味，但唔会大重腌料味，整体真系一流，甚至好过当年我几爱嘅「小王」。配台湾面，呢个面底坚系掂，面身粗幼均匀，熟透但有硬度同弹力，好食过几乎所有XX牛肉面。红烧牛肉个汤浓而不油，牛坑腩个汤就啱啱相反，油光满面但口感清甜，呢种汤几鲜味，可以饮晒成碗。坑腩系典型肉、膏、筋分明𠮶种，爽口，有少少韧，冇多余腌味。呢件坑腩我觉得系长沙湾最佳「清汤腩」，计「牛腩」，未能靓绝长沙湾。牛筋大大嚿但好腍，如果钟意有少少爽口质地就唔对嘴型，我就几like。佢门口𠮶堆辣牛油膏、辣粉，真系真系真系好辣，唔算食得辣咪乱试，会脷都肿。听讲呢间系最后一间「元洲牛肉面」，好似话都就嚟折。可惜，希望厨房团队揾到新落脚地。