大快活 (西洋菜南街)

营业中

休息中

昨天朝圣完肥姐，在附近办完点事，行经此位于西洋菜南街地窖，门面起地面嘅快餐店门口，心血来潮，一步步行入去，最先吸引我嘅系两部自助售卖机，睇嚟两大一美连锁快餐店只剩一美未有自助售卖机了。由于午餐已经食咗一碗面，再加上肥姐三串名物，个肚唔算饿，所以叫了其中一款最平嘅特价餐，$28嘅沙嗲牛肉煎蛋猪仔包，又记得呢度啲咖喱唔错（至少比美心好食），所以加配咗一个咖喱鱼蛋，饮品叫咗个茶记非常少见嘅忌廉汽水。可惜呢间分店没有烧味饭供应，否则，我应该会叫迷你叉烧饭，配咖喱鱼蛋，叉烧饭配咖喱汁，加上少少豉油，真系正到不得了。讲返今次食物，$11有6粒鱼蛋，而且系预先浸个咖喱嘅炸鱼蛋，完全收货。沙嗲牛肉嘅汁唔会过多，而且有沙嗲味，即使无用餐纸，都不会食到成手系汁，当然，莫讲咁嘅价钱，即使多一倍价钱都未必食到有牛肉味嘅牛肉啦！只蛋系预先煎好，所以有啲冻，但都预咗；汽水都系正常。整体嚟讲，食物质数合格有余，收拾速度以三大嚟计，排中间，最慢系美心。环境方面，地方光猛，环境清洁，认真唔错。