滾得棧

营业中

休息中

为振兴本地消费，今晚成班老友左拣右拣，上埋打边炉关注组揾下香港有边间打边炉好食唔会中伏，见到滚得栈好多人推介，啲食物都几是是正正，就决定会一会佢。滚得栈位处食肆林立既棉登径，门面黑底红色大字非常抢眼，上一层到餐厅大堂，座位唔算多但系枱与枱之间相当阔落，唔会好迫，而且通风几好，食完应该唔会成身味。人齐开始点菜，火锅汤底拣左特浓花胶鸡汤，可以饮完鸡汤先慢慢打边炉，鸡汤唔算好浓，饮落唔会好咸同渴，花胶质素不错，仲有半只鸡食，绝对对得住个价位。打边炉梗系唔少得食牛，先来一碟招牌手切牛颈脊，牛味十足，口感软淋，份量都好足，七个人食都好够。然后一碟爽脆金钱𦟌，食落去好有口感，越食越有牛味，同样份量唔少。另外我哋仲点左韭菜饺，珊瑚蚌，三秒腐皮，炸鱼皮，竹笙等等，个韭菜饺尤其出色，算得上皮簿馅靓，值得一试，每样边炉料都好有质素，滚得栈仲有好多海鲜，牛内脏可供选择，不过朋友唔太好，所以无办法一试，相信质素都应该唔错。食饭当日系闲日，餐厅到8点几都系得3成满，真系感叹生意难做。最后一提系滚得栈店员相当有礼，服务周到，成餐饭都食得好舒服。