有情有意 (已結業)

为食猪买咗呢间社企餐厅嘅任食团购，本来对呢度嘅食物冇抱特别期望，结果令为食猪都几满意。任食选择唔算好多，但由沙律、小食、主菜、甜品等等都各有几款可以拣。先黎食啲沙律先。我哋分别叫咗烧鸡肉田园沙律同凯撒沙律。烧鸡肉沙律嘅烧鸡好香好惹味，黑醋汁略为浓味同甜，系一道比较重口味嘅沙律。只有菜，面包粒，芝士粉同烟肉干粒嘅凯撒沙律就相对清爽，为食猪一致认为如果将烧鸡肉加入凯撒沙律一定。是日餐汤系杂菌汤，杂菌用料十足，成个汤都充满浓郁菌味，为食猪话好啱钟意菇菌类嘅佢。怀住不安嘅心情都点咗鱼生同寿司试下。我哋每款都试过，结论系鱼生唔算新鲜，有啲腥，可以不试。亦试咗两款火焰醋饭卷，其中带子果款嘅带子几好味，但两款饭卷都太大旧而且个饭煮得太烂。烟三文鱼慕丝胡麻酱豆腐都几清新，唔太食到烟三文鱼慕丝味，豆腐好滑。麻酱冷面意想不到嘅唔错，比起出面放题嘅可能更好味，用料有心思，竟然有日式腐皮。呢个卡邦尼为食猪觉得值得推介，比起外面好多餐厅同cafe做得好，忌廉香浓而且有蛋黄香味，美中不足系配料俾得少。黑松露野菌意大利饭亦唔错，松露味尚算浓郁，亦有唔少野菌。鲜虾墨汁意大利饭就一般，虾系爽口嘅但墨汁意大利饭冇咩味道。