蘇浙滙

营业中

休息中

苏浙汇虽然贵为米芝莲一星食肆，价钱亦只属中价，但周末午市客人竟唔算多，可能位置太偏僻吧。 呢碟佢叫黑叉烧嘅菜，其实类似黑豉油煮红烧肉，入口甘香无肥腻感觉，份量唔多但以肥猪肉嚟讲份量刚刚好。 面筋时蔬，咪以为素菜就好健康，𠮶几旧面筋简直系罪恶之源，索晒所有汁，冇切到碎晒大大旧原旧食，所有索咗嘅汁锁晒喺旧面筋入面，食落有面筋口感又有油香，正!不过可能仲肥过猪腩肉!哈! 苏浙汤包，唔知系咪特登唔叫小笼包，因为而家啲小笼包好似斗皮薄，呢度汤包嘅皮就偏厚。不过印象中呢啲先至系以前食小笼包嘅风味，皮厚厚哋先有面粉味，先似食紧包嘛... 炸春卷就普通，略嫌过火。 甜品方面，汤圆正常水准，汤入面有桂花但饮落无桂花味，只系煮完汤圆嘅水一碗。绿豆糕味道冇乜惊喜，口感就不俗，冇散开亦唔黏口。 总括嚟讲，呢度比起坊间卖类似食品又级数近似嘅连锁餐厅一啲都唔输蚀，不妨行多几步一试。