岩鹽日本料理 (利舞臺廣場) (已結業)

Peak season OT ，一个人鼠出去叹个晚饭。话明系叹梗系要食得好少少，所以拣咗呢间以打工仔晚餐角度嚟讲都算中高级价位嘅日本餐厅。点咗一客「烧鹅肝澳洲和牛釜饭」$168，再加一串「烧牛舌」$30 同埋「汁烧墨鱼串」$20。「烧鹅肝澳洲和牛釜饭」都几有仪式感，一上菜，店员就摆低个沙漏，还漏完之后先可以打开釜饭盖，再淋上酱汁搅匀食。呢个set仲跟几块鱼生、面豉汤、沙律同埋渍物。鱼生有三文鱼、带子同埋一块唔知乜嘢。味道方面坦白讲，系好鲜甜新鲜嘅，可惜份量就相当有限，到喉唔到肺，唔紧要啦，个饭先系重点。打开个饭盖热气腾腾嘅香味扑面而来，淋上酱汁再搅匀，个饭嘅份量足足可以𢳂出三碗，份量好鬼足，釜底仲有少少饭焦，成个饭仲混入菇呀、栗子呀，捞埋食好甘香可口。至于烧鹅肝，得一块，好彩算厚切，而且油脂嘅香味无得顶。澳洲和牛就4-5块，都唔薄，本身睇落以为有啲硬硬要出啲牙力，但食落发现其实几嫩口，而且肉汁喺齿缝间渗出，几正斗。串「烧牛舌」就好难有得输，汁多味美爽口。串「汁烧墨鱼串」就一般般喇，口感系几滑溜嘅，不过就比较淡味。