Top Blade Steak Lab (新城市廣場一期) (已結業)

心血来潮想食flat iron，突然谂起可以试吓top blade。睇咗几张食评嘅相都觉得个蒜头望落去好正，于是叫咗个香草平铁牛扒。一如flat iron特色，够软属，牛味都好够。蒜头煮到好冧，同flat iron几夹。不过同桌同我都觉得，牛嘅份量唔够多，如果唔加钱增量的话可能会唔太够食。是日牛扒系慢煮牛，一样非常软身易咬，不过个人觉得呢块牛味冇香草牛扒咁重。粟米烧得几香。头盘嘅沙律就系好健康嘅荞麦沙律，口味偏轻。南瓜汤就几浓郁。食top blade最重要当然系任食薯条，唔加胡椒之前，薯条都有阵淡truffle味，加上热辣辣送上枱，真系忍唔到口食多两碟。Dirty lemonade 听讲都几受欢迎，不过自己就觉得佢比较普通，不过唔系非常甜，当系为呢餐解腻都ok。新出嘅特饮开心果奶盖几特别，但茶底更令我印象深刻，香味够又唔涩，如果有单卖红茶底就好了。附上晚市餐牌，老实讲虽然质素唔系差，服务态度都好好，但价钱真系偏贵，唔知系咪地段问题。所以真系偶尔黎吓过口瘾就够了。