Wheatfield X 羅宋湯專門店 (MOKO新世紀廣場) (已結業)

天气转凉，日日唔系火锅就系打边炉，已经生咗两粒飞滋，今晚捉咗先生嚟位于MOKO嘅呢间罗宋汤专门店，希望食得健康啲。餐厅除咗主打嘅罗宋汤之外，仲有清鸡汤同红菜头汤，配搭唔同嘅食材组成套餐，感觉健康又有益。除咗主食之外仲有几款优惠小食，价钱亦唔贵。酷爱汤乌冬嘅我一谂就觉得罗宋汤同手打乌冬应该几夹，果然不出我所料，香浓惹味嘅罗宋汤配上弹牙嘅乌冬，完全系一拍即合，而且份量颇多。牛腩半肥瘦，口感香软腍滑，同罗宋汤相辅相成。汁烧猪髀肉一份两片大大片，入口略为干身，口感偏瘦，但肉味颇浓，酱汁亦出色。先生嘅捞面套餐份量亦好足，自家制麻辣酱捞出前一丁极度邪恶，辣度颇强，越食越过瘾。罗宋汤另上，感觉比起我嘅乌冬汤底更浓郁惹味，配料亦非常足。香煎鸡扒外皮香脆，但肉质唔会好干，而且大大件非常抵食。本来担心食唔饱所以叫埋猪仔包，估唔到超有惊喜！外表烤得好香脆，配上份量大方嘅炼奶同牛油，无懈可击！餐厅食物质素唔错，特别系主打嘅罗宋汤，汤底浓郁配料又足，连一向奄尖嘅先生都非常满意，又一次证明健康餐都可以好好味嘅！