Rasoi 傳統印度菜 (已結業)

今晚我同老公一齐去大角咀揾嘢食，行过见到一间餐厅都几印度风情，决定入去试吓食。入到去餐厅嘅布置真系好特别，餐桌壁画全部嘅布置都好传统。仲有好令我哋两个有深刻印象嘅就系有个大电视，一路播住传统嘅印度音乐，成餐饭就好似系印度食咁。餐厅老板和侍应都系印度人，所以你要同佢讲英文落单。花多眼乱，我哋两个决定嗌个蒜蓉烤饼同埋芝士烤饼同埋两个咖喱菜式加海鲜汤。无论你点咩嘢食，餐厅都会先俾你一个免费前菜，系一个好精致嘅脆薄饼再加三只传统嘅酱料，有清新嘅薄荷味、辣味同埋烧烤味。脆薄饼加少少呢啲酱料嚟食就有唔同嘅口味。好好味。。由于我同老公都好钟意饮汤，我哋决定一试印度嘅汤，我哋拣咗个海鲜汤。好彩个汤冇令我地失望，汤入边好足料有好多海鲜，包括墨鱼虾等等嘅材料。跟住再嚟咖喱鸡同埋咖喱鱼。先讲讲个咖喱鸡，鸡肉非常嫩口同入味，咖喱好香有少少微辣，配合个鸡肉食入口，非常有口感。再讲讲个咖喱鱼我觉得个咖哩汁有啲偏辣，但系钟意食辣嘅老公就觉得超级惹味。好得意，咖喱鸡同埋咖喱鱼两只咖喱系唔同口味嘅咖喱，香味同辣嘅程度都唔同，绝对值得一试！另外个芝士烤饼味道带点清淡，所以用黎点汁食就啱啱好，配合咖哩汁后的味道非常之突出。