蓮香棧 (已結業)

如果你系一个怀旧嘅人，一定唔可以错过「莲香栈」，上至装修，下至菜式，都离唔开传统两个字。一行入去，古色古香嘅仿紫坛木装潢，令人犹如去咗七、八十年代，天花板挂满吊扇，墙上又挂上雀笼... ...呢啲都系旧式茶楼嘅特色！座位嘅枱有两层，面层系摆点心，下层系摆客人嘅物品。听讲以前嘅茶楼系按蒸笼计数，好多茶客都会将啲笼收喺下层，咁就可以瞒天过海，收少几笼钱。不过大家千祈唔好咁做，系犯法架（当然依家用点心纸或电脑落单，想走数都难）！点心方面，虾饺烧卖凤爪等传统点心系必备，但小妹只闻其名，未尝其味嘅一定非「金钱鸡」莫属！原本以为系鸡肉点心嘅我，一食就满口油花，原来系胆固醇超高嘅猪肉、鸡肝同肥猪肉夹成嘅三高组合，将佢哋切成圆形，串埋一齐烧，烧嘅时候涂上蜜糖同麻油，外表似叉烧。晴天霹雳后就系一阵甘、香、甜、润嘅滋味，咁大个女第一次食咁得意嘅嘢！店内仲有另一传统美食——鸭掌包，但为咗健康著想，下次先试！另外，佢仲有姜汁糕，呢款手工菜要逐层蒸，超花功夫同时间，只有老店先有咁嘅功力！食落姜味浓郁又Ｑ弹，系落足料之作！