上野鐵板燒專門店 (已結業)

第一次写食评，想一赞呢间铁板烧！本来都无太大期望，系我老公话未同我食过铁板烧所以盲中中就去试！开头见无咩人食，心谂：会唔会真系难食先无人架？我地坐系吧位，可以欣赏下师传既手势，叫左个大虾二人餐！有埋沙律同双色刺生，出奇地新鲜呀刺生够鲜甜大件！正！已经开心定先！再黎个沙律都好好味，开胃！之后见到师传开始整我地啲虾喇，佢手势好好，赏心悦目！佢地好食在个配汁夹得好好，啲虾够口感又入味！之后有炒杂菜同双色瓜！都系味道岩岩好，正！到块牛扒喇，我地要五成熟，整到岩岩好，有肉汁有烧香味！可能因为我地坐吧既关系，佢仲熄灯点火烧一烧块牛！哗哗。。。。可能烧一烧更加带出左牛扒本身既肉汁香味，真系好睇又好食！稍为逊色少少既系个牛肉炒乌冬，啲牛肉硬左啲！但应该系材料问题！最估唔到既系师传将开头个两只大虾既虾头都烧左俾我地食！香脆好味，第一次甘样食个虾头咋！好有惊喜！个餐有埋甜品，我地叫左一个鸡蛋布丁，一个芝麻雪糕，好味！睇得出师传好用心去煮每道菜，我要赞师传！佢系高高地黑黑实实眼细细既！下次去食都要揾返佢整！