陸記正宗桂林米粉

营业中

休息中

之前听朋友话陆记嘅双猪饭同白凉粉好食，个日经过就试下，店铺并唔起眼，揾左一阵先见到。我点左朋友推介嘅绝代双猪饭同水晶凉粉。双猪饭真系好大碗，秘制锅烧肉超厚切，猪皮烧得好脆，烧肉唔肥腻，肉质鲜嫩，真系啖啖肉香。而卤水猪颈肉亦整得恰到好处，卤水汁香，成功令猪颈肉更味美。两种猪嘅唔同部位再加上入味嘅肉燥汁送饭，令人好满足。再试埋镇店甜品水晶凉粉，我第一次食白凉粉，感觉好新奇。透明嘅水晶凉粉对比普通黑色嘅凉粉味道较淡，无草药味，但口感好爽，质感较软身，有少少似啫喱，水晶凉粉配花奶，味道的确唔错。套餐除左甜品，仲有饮品附送，最后我饮左一杯热杏霜，依家出面已经好少有杏霜饮，再者出面更几乎无水晶凉粉，大家有机会可以去陆记试下。我食到好饱，埋单都只系$54，绝对价格相宜，值得尝试。