板上 (中海日升中心) (已結業)

今个星期日喺附近啲工厂大厦玩完VR，上openrice见到网友介绍呢间板上，地方舒适之余仲要无时限任坐，啱哂同班战友喺度赛后检讨。餐厅采取自助形式，出去买完飞攞张飞仔坐番埋位等，唔怪之得价钱能够做到咁贴地。首先嚟嘅系冻巨峰乳酸梳打，甜度平衡，巨峰提子嘅味道同乳酸好夹。水牛城鸡翼，最钟意水牛城鸡翼甜甜酸酸之余仲带点辣味，呢度嘅水牛城鸡翼除咗味道好之外，外皮仲非常香脆，绝对值得一试。安格斯牛肉汉堡配脆薯皇，汉堡相当巨大，目测有成四吋厚，面包松软，伴随著嘅系香口嘅芝麻，内馅十分Juicy，安格斯牛肉个牛味果然系香浓啲。蒜香三文鱼烧鸡配珍珠饭，我哋另外仲加咗一块可乐薯饼，烧鸡嘅照烧汁用嚟送饭一流，三文鱼都几大块，块薯饼入口都仲系热辣辣㗎。餐厅位处观塘嘅商业区，星期六日嚟个感觉特别休闲，临走闻到咖啡嘅香味，下次再嚟试吓先。