影片
更多
2013-09-12
31 浏览
早前晌湾仔曼谷泰菜食饭，偶尔见到斜对面楼上食肆有个小阳台，感觉几别致，不过当时都喺「霎吓眼」睇睇，未有太刻意细望。再睇睇侧边餐厅个招牌「Jack's Terrazza」，咪好似有一间晌三里屯，事后得知原来旧铺搬咗过嚟，估唔到事隔两个月，就有幸嚟到依个「杰克小阳台」嚟试菜，真喺多谢食友嘅引荐。其实，意大利菜一向都喺小弟喜爱嘅菜系之一，今晚仲要美酒配佳肴，实在喺一个愉快嘅晚上。餐厅位处骆克道尾一街角，离地铁又唔远，旺中带静。一进店内，幽暗嘅灯光令环境颇富情调，跟街外嘅五光十色相映成趣，个人觉得非常适合情侣嚟晚饭庆祝，又或一班人嚟庆生日。全店分几个用餐区域，枣红色皮櫈皮梳化椅，配红白格仔布餐枱，颇有古旧味道，枱上餐酒杯、一整套餐具、蜡烛灯，样样都做得认真细微。而一众都认为最别致莫过于近窗嘅秋千椅，悬挂嘅卡位唔喺得个样，可以摇摇荡荡，感觉写意呀！叫得Terrazza，点都要保留番有个小阳台，餐厅对街一角就喺喇，依家天气有少少热，感觉可能差啲啲，点知原来可以放下透明胶帘，再开少少冷气，一样变得舒服凉快㖞；当然，秋凉时节，配合宁静街景，就更加称心惬意。是晚安排咗8道菜式，由前菜、沙律、米饭、主菜至
餐厅位处骆克道尾一街角，离地铁又唔远，旺中带静。一进店内，幽暗嘅灯光令环境颇富情调，跟街外嘅五光十色相映成趣，个人觉得非常适合情侣嚟晚饭庆祝，又或一班人嚟庆生日。全店分几个用餐区域，枣红色皮櫈皮梳化椅，配红白格仔布餐枱，颇有古旧味道，枱上餐酒杯、一整套餐具、蜡烛灯，样样都做得认真细微。而一众都认为最别致莫过于近窗嘅秋千椅，悬挂嘅卡位唔喺得个样，可以摇摇荡荡，感觉写意呀！叫得Terrazza，点都要保留番有个小阳台，餐厅对街一角就喺喇，依家天气有少少热，感觉可能差啲啲，点知原来可以放下透明胶帘，再开少少冷气，一样变得舒服凉快㖞；当然，秋凉时节，配合宁静街景，就更加称心惬意。
是晚安排咗8道菜式，由前菜、沙律、米饭、主菜至甜品，都感受到每道菜都喺大厨心血，选取优质食材，配以精良酱汁，十分令人回味！面包篮
食大部份西餐嘅指定动作，食意菜就更加唔少得。一小篮面包，有数个小圆包及意大利面包棒，算唔上好有特色，但微暖，香软，为今晚丰富嘅意菜打开序幕。
露笋软芝士风干牛肉卷 $98个人觉得依个风干牛肉卷配搭几特别，小弟亦几钟意，以意大利风干牛肉卷住羊奶芝士及美国鲜露笋，咸香柔软嘅牛肉之下，衬托出带微膻嘅羊奶芝士及爽脆嘅鲜露笋，滋味三重奏。牛肉卷底下伴以榛子酱，好香榛子味，味道挺特别，不过跟牛肉卷唔算太夹。另外，配菜嘅沙律菜、车厘茄、黑橄榄、雅枝竹，下咗意大利黑醋，真喺色香味俱备，尤其烧香过嘅雅枝竹，带点甘，带点脆，几有心思嘅配搭。
地中海快烧生吞拿鱼柳伴火箭菜车厘茄沙津 $138虽然个菜式名好长，但实际做法唔花巧。新鲜挪威吞拿鱼柳整件轻煎，再蘸香草及黑椒碎，然后薄切上碟，由于只喺轻煎过，有啲近乎食鱼生嘅感觉，味道很鲜甜。配菜喺火箭菜及车厘茄，以柠檬、香草、橄榄油所做嘅沙津汁，再加埋意大利黑醋，个沙津底食起嚟很清新。
杂锦海鲜龙虾忌廉汁烩意大利饭 $178个烩意大利饭绝对喺高水准之作，一上枱已好香龙虾味，饭粒烟韧有咬口，浸淫鲜龙虾及忌廉打成嘅酱汁，非常之惹味，兼且份量啱啱好。一小啖白酒，一小口意大利饭，令人津津乐道。而海鲜阵容亦好有睇头，有大蚬、青口、鱿鱼、鲜虾、带子，海鲜甚具质素，鲜甜味美，还要一人一份，食得十分满足！
柠檬雪葩间场嘅雪葩，甚有食意菜嘅惯常次序。据讲，柠檬喺选用嚟自意大利西西里嘅，贪其够大又皮薄，挖肉做成柠檬雪葩，再酿番入柠檬皮内，加少少忌廉唧花及士多啤梨伴碟，令人睇见都感觉清爽。雪葩入口芳香微酸，晌仲夏更感冰凉，让味蕾清新一下，为使稍后食主菜时更能品尝其真味。
香煎原条新西兰龙脷鱼配青柠牛油汁．烤香草新薯及鲜菜 $188主菜共预备咗3款，有鱼，有家禽，有肉，可见店方都希望让大家试到唔同种类食材。打头阵喺香煎原条新西兰龙脷鱼，平时食龙脷柳食得多，今回原条龙脷鱼香煎，虽然鱼嘅卖相唔喺好靓，但肉质非常细嫩，外层亦十分焦香，唧下鲜柠檬汁，感觉无咁油腻，而柠檬预先烧过，细节位一啲唔马虎。但整碟龙脷鱼最大惊喜，小弟就认为喺个青柠牛油汁，味道油香鲜活，蘸鱼一流。
香草芝士烤春鸡 $188单睇外表，真喺察觉唔到有咩特色，但细味之下，可以话喺平凡中嘅不平凡。春鸡肉质鲜嫩柔滑，据介绍原来喺以法国野鸡仔入馔，拣选一磅多少少重嘅，再以香草腌匀鸡只，先煎封锁肉汁，后加上巴马臣芝士烤焗，无怪乎咬落皮脆而肉汁丰盈，芝香又惹味。最有趣喺烤春鸡上面撒下数片炸紫薯薄片，粉粉甜甜。至于伴碟嘅烤香草新薯及时蔬，亦香口好味，唔好轻易错过。
蕃茄红酒汁烩牛仔膝 $228最后一道主菜「烩牛仔膝」，唔单只有牛仔膝，仲有牛骨髓添，大可补充一下骨胶原。牛仔膝颇为大件，利用红酒及蕃茄制成酱汁再跟牛仔膝烩焗4小时，可谓心机菜，绝对急唔嚟，牛仔膝烩得软腍松化，当中又带有少少牛筋及脂肪，令口感有咬口但唔会觉韧，有油香又唔会觉腻；再者，酱汁味道酸香醇厚，非常浓郁，令牛仔膝好入味。至于配上嘅栗米饼，外型好似西多士，香香脆脆，饼心软绵，蘸蕃茄红酒汁，另有一番风味。
甜品拼盘 $188小弟一向好甜品，所以见个甜品拼盘咁大份咁丰富，加上同枱部份食友对甜品一般，间接益咗小弟食多两件。甜品有传统嘅意大利芝士蛋糕，大路嘅蓝莓芝士饼，仲有较为特别嘅特式意大利朱古力芒果雪糕。意大利芝士蛋糕做得不俗，虽然唔喺用手指饼，但蛋糕有咖啡酒香，而马卡风芝士清淡幼滑；蓝莓芝士饼嘅牛油消化饼底够薄，芝士味够浓，蓝莓果肉又够香；而特式意大利朱古力芒果雪糕当中嘅芒果味未有期望中咁突出，但雪糕质感就的确滑溜。
餐酒上文话明今晚喺美酒配佳肴，为著不同菜式，总共试咗4款餐酒，包括衬前菜、沙律嘅白酒Pinot Grigio 2011 (Italy)，衬意大利饭嘅白酒Chardonnay 2011 (South Australia)，配主菜嘅红酒Shiraz 2012 (South Australia)，以及伴甜品嘅白酒Moscato d’asti 2008 (Italy)。识我嘅人都知小弟唔好酒，浅尝无妨，加上同枱食友有品酒师，评酒嘅重任当然留俾人做，不过，都想写番两句个人体会。平时甜品时段，都喺配咖啡多，今次改以衬Dessert Wine，感觉真喺几特别，Moscato d’asti酒精度颇低，且带甜味，极之易入口，搭上各款甜品，有一种几融和嘅感觉。
对「杰克」整体嘅印象，就正如食评个标题「优材良酱」，店方晌食材嘅拣选及酱汁嘅调制，都好有心思，无怪乎大家都食得称心满意，小弟就更感份外满足。
张贴
