利滿皇宮 (已結業)

好耐冇一盅两件，今日就嚟到元朗西铁站附近呢间新开嘅酒楼饮下午茶。地方好大好宽敞，又光猛，装修陈设应该系上手留低嘅，唔系特别新，不过都干净企理。虽然食肆堂食放宽到4个人，不过都冇以往周末去酒楼饮茶咁墟撼要排队攞飞。睇嚟饮食业都仲要挨一排。点咗嘢食唔使等好耐就陆续上枱。酱皇蒸凤爪都好腍好入味，中规中矩。川味牛柏叶爽口惹味，辣味啱啱好，唔错。黑松露炸虾角，外皮炸到好香脆，不过就比较油，蘸沙律酱食就冇咁腻，里面嘅虾肉都爽甜嘅，不过就唔系点食到黑松露味。陈皮牛肉肠，肠粉唔会太厚，但就略嫌唔够爽滑，牛肉都新鲜有牛味，陈皮味就唔太出。XO酱炒肠粉，肠粉滑但XO酱味唔够惹味，配埋青红椒芽菜炒冇咁油腻嘅口感。排骨陈村粉，粉质厚实唔够滑，略嫌干身，味道系ok的。黄金糕，口感比较实，唔够松软Q弹。蒜香水冬芥菜，都几新鲜，甘甘甜甜，本来谂住食啲菜解下腻，不过都落咗几多油落去炒，食起上嚟系好食嘅。