韓奶奶拌飯

营业中

休息中

韩奶奶拌饭开左喺元朗好几个月，主打韩式釜饭嘅餐厅！身为元朗人终于过黎试下。主打嘅韩式釜饭有多款口味，仲有秋冬限定嘅釜饭选择。每份釜饭嘅份量都唔细，仲有3款韩式小菜、通粉沙律同埋汤！除此之外，menu上仲有好几款韩式小食可供选择添。今次就点左餐厅招牌之一嘅特级牛颈脊拌饭。食之前加入秘制照烧汁，再连同釜饭入面嘅生蛋黄、香葱、牛油、芝麻、烧牛颈脊粒等配料拌匀就食得。拌匀后嘅釜饭好香口，照烧汁嘅甜同牛颈脊嘅牛脂香都突出，味道上好惹味。特别中意釜饭入面嘅杂菌！釜饭底部嘅饭焦都好脆口又好味。另一款釜饭点左秋冬限定嘅炙烧厚切鳗鱼拌饭。中意食鳗鱼嘅唔可以错过呢一款！有5块鳗鱼，每块果然都好厚切，而且口感好爽脆又弹牙。虽然味道上牛颈脊釜饭会惹味同浓味啲，不过呢个都唔错。另外，仲试左两款呢度嘅小食。炸薯饼有惊喜！同平时嘅炸薯饼唔同，呢度嘅薯饼口感系一丝丝薯丝。上面嘅雪花芝士乳酪酱芝士味好香，但又唔会太浓太腻。炸珍宝生蚝好饱满！外脆内嫩又鲜甜。