炑八韓烤 (黃金廣場) (已結業)

A姐呢排好青春呀，生咗几粒暗疮，所有热气嘢一律唔入口，介咗口两日，我今日就偏偏约佢食韩式烧烤，呢间位于铜锣湾嘅炑八韩烤仲要系佢曾经食过（提早圣诞、豪华韩蟹餐），佢鬼死咁钟意，睇佢今次点忍得口。一坐低就有韩烧炉边蛋、芝士粟米、同各式泡菜。最开心系无限任添，钟意嘅就记住食多啲呀！今日我哋叫咗新出嘅八爪鱼生蚝木架套餐，两人份量十足，A姐见到木架上嘅肉，已经唔记得咗𠮶几粒暗疮，大啖大啖咁食。烧烤拼盘呢个木架上有新鲜弹牙大虾、口感十足嘅猪肩肉、肉味香浓嘅LA骨、仲有芝士生蚝同惹味牛油芝士生蚝，好丰富架！而我最钟意就系牛小排，牛味十足，仲要入口即熔；而另一最爱就系烧到微㶶嘅猪颈肉，够晒脆口，肥瘦度十足，好好味呀。大八爪鱼除咗烧烤拼盘上嘅肉类，仲有呢只大大只八爪鱼，少少辣，腌得好好味。八爪鱼生蚝汤食咗咁够热气嘢，饮返碗鲜味十足嘅八爪鱼生蚝汤，真系好满足呀。套餐仲要包2杯饮品，呢餐我哋食得好满足呀！