小欖燒烤樂園 (已結業)

天气开始回暖，趁炎夏前约埋班好姊妹黎个全日烧，个个都有大有细，去自助烧烤场就最方便。今次拣左小榄烧烤乐园，早2年食过相当满意，唔知keep唔keep到水准呢。烧烤场位于沙滩旁，占地广，环境优美，场内空间十足，干净企理，最令我惊喜系连洗手间都非常清洁。食物自助吧，有多款食物选择，旁边有小士多，出售饮品同小玩具。食物卖相新鲜吸引。我地加左烧烤网同夹，凑住小朋友，咁烧方便好多。蚬肉用加入调味料，用锡纸包住烤半小时，一打开已经鲜味扑鼻，全部开晒口，而且冇沙，蚬肉鲜甜多汁，绝对性比价高。食物水准唔错，样样都好好食。粟米青椒等蔬菜类都好新鲜，而且处理得好干净。法包配上蒜蓉牛油（$2）随便烤一烤就成为一道美食，蒜蓉牛油非常香滑，又唔会过咸，加上烤脆左既法包，结果系...我食左超过十块，正！韩式五花腩，肥瘦适中，烧熟后油脂微焦，加上微辣既味道，味道比美韩烧店，仲要食多都唔觉腻。仲有鸡翼同猪颈肉，我都非常欣赏，全部都腌得好入味，烧到外层微焦，内里仍然充满肉汁，非常juicy。场内有大空地，小朋友可以跑跑跳跳，大人就烧得更开心啦。环境舒适，店员非常友善，食物好似比上次黎更加美味，下次烧烤聚会，一定要再黎。