六小館

送完朋友机之后返左东涌食晚饭，顺便行下outlet。行到六楼见到一间叫六小馆既餐厅，见到门口餐牌既二人套餐，价钱唔驶$300，所以入左去先。餐厅属于半开放式，我地坐系蓝砖胸墙旁边，环境非常开扬。装潢方面，时尚怀旧兼备。由于女友太想食盐焗鸡嘅关系，我地放弃二人套餐，改为散叫。古法盐焗鸡叫咗半只，味道唔会死咸，肉质几嫩滑，唔算啖啖肉但唔会好多骨。另外用盐焗鸡既鸡油作拌饭一流。野菌豆腐煲顾名思义有野菌同豆腐，其实仲有其他材料，豆腐野菌非常入味，略嫌份量比较细。蟹粉小笼包有我拳头咁大，但外皮出奇地薄，充满弹性但不会轻易破掉。邪恶的蟹黄油流晒出嚟，入面馅料啖啖都有蟹黄，非常鲜甜。灌汤饺入面包括大量猪肉馅，原粒瑶柱，鲜虾等等，包薄不在话下，上汤同饺比例系1:1，上汤非常清甜，加唔加红醋就悉随尊便。以后大家行完outlet可以试下六小馆，相信一定更加满载而归。