部屋咖啡室

约咗好多年冇见嘅朋友聚旧，一心谂住揾间餐厅食吓饭，倾吓偈。所以系网上揾咗呢间cafe，网站上写明繁忙时段，限时3小时。食饭当日收到餐厅WhatsApp。确认出席后，我顺带透过WhatsApp 询问如冇人等位，可否坐耐啲到7点。最终收到嘅回覆系可以。我同朋友下午3点半去到。5点店员已经要求我哋付款，并表示必须5点半前离开。我即时询问店员冇客人等位，可否坐耐啲（亦同时表示我WhatsApp 询问过，回覆可以）。但店员完全冇理会，继续执枱，并准时5点半再次要求我哋离开。离开时cafe仍然好多吉枱，外面亦都冇人等位。我同朋友非常无奈。莫讲话放宽时间畀我哋，连网站内列明限时3小时嘅承诺都兑现唔到。完全打乱哂我哋饭后嘅行程。本身间cafe环境同食物都普普通通，拣呢到都系贪佢可以慢慢食，倾吓偈。如果早知用餐时间不相符。我就一定唔会拣呢到！奉劝各位，如果想去间cafe坐耐啲，又坐得舒服啲，可以另觅他方。另外，cafe推出订座优惠，两位以上顾客全单有95折，因当日店员临时赶客嘅举动令我心不在焉，忘记check单，隔咗咁多日先醒起，最终餐厅连95折优惠都冇畀到。