老掌櫃東北菜館 (已搬遷) 新店位置

见到网上评价咁高，特登预早两日定位，谂住可以食到正宗东北菜嘅口味，点知只系属于普普通通嘅货色，唔系大家讲得咁好啰。或者系我叫唔中佢哋拿手嘅小菜？头盘叫咗醉鸡，其实味道都OK嘅，但系略嫌鸡肉唔系太入味，同埋有少少生得滞，整体鸡肉尚算爽口，中上水准。跟住之后就叫咗一碟松鼠鱼，一上枱，都觉得怪怪地，因为颜色实在太过鲜艳，感觉好假。食落口，真系非常非常酸，白醋落得太多，有少少赤亲喉咙嘅感觉，同埋碟𩠌放入好多急冻杂豆，奇奇怪怪咁，同成件事完全唔搭。失望呀！跟住就到呢个所谓嘅排骨担担面。其实佢担担面系做得唔错嘅，口味尚算正宗，不过就清淡左少少，我希望佢浓味啲，都OK嘅。但系最激气就系𠮶啲排骨，炸得超级差，又淋又滴油，一睇就知油温未够就放落去炸，食咗一旧就再冇兴趣食第二旧入口。或者系咪我抱太大期望呢？一话呢度真系唔夹我嘅口味呢？我觉得呢度非常普通，或者我应该俾多次机会佢？我唔知，因为我觉得太多餐厅，比佢做得更好食、做得更出色了。