囍 (已結業)

今晚约咗个保险朋友倾保单，平时佢都系孤寒度最多请我食麦当劳，点知今晚佢约我系佢公司楼下打边炉，心谂佢都应该跑唔到数揾我加大张单，还掂系佢请，我就食咗先算！间边炉系伟业街同敬业街既转角位，宏利金融中心一楼，系观塘站沿开源道向海行一阵就到！入到去见到佢好似唔使钱咁叫咗成十几碟牛肉，佢仲唔等我食紧添！见到牛肉切得够薄，放入喜㶽烧沙底滚两滚就食得，放入口唔硬又够鲜，最重要就系汤底唔会太浓，唔似其他边炉咁一味太甜抢晒牛肉既味。个保险佬仲博命叫我饮啤酒，虽然任饮但都唔使人出酒你出命，所以借机话出去自助吧拎野食行开下先，自助吧都系正常既丸类菜类，但米线意粉就好有心机用个类似香水樽装起，真系睇得又食得👍通常食边炉之后，不外乎系牛记雪糕杯，但呢到就有部自助雪糕机无限食牛奶或绿茶雪糕，仲可以用甜筒装起，好似以前7-11食雪糕既感觉！牛奶同绿茶我都食过，打完边炉最好都系食绿茶，够消滞之余又唔怕肥！🙏唔经唔觉九十分钟过去，系时候埋单！原来都系$168加一，咁就真系正过系同区观塘道某放题大厦既边炉！最重要有靓靓海景睇！下次带埋男朋友来食下先！