魚一丁刺身居酒屋 (已結業)

对上一次帮衬过佢哋个便当，印象唔错吓 (虽然有D贵) 。于是今日下昼又去食Lunch，叫咗过杂锦鱼生饭Set。初时以为系一大碗上，攞到嚟先至知系用一只好大嘅碟上。份量好多吓！同传统嘅定食一样，个餐跟埋前菜、咸菜同味噌汤。先讲味噌汤，味道够味得嚟唔太咸，掂！不过配料只得昆布就未免马虎咗D，至少都可以加D豆腐粒或金菇等配料啦。再讲，前菜同咸菜都系令我觉得一样有D马虎嘅感觉。虽则前菜大多数(即使正宗嘅日本料理) 都系用D头头尾尾剩余物资做出嚟，但系今次呢个汁煮南瓜 (冻食) ，望落去就未免有D求其，上次食便当嘅时候前菜系大根煮鱼头，味道同诚意就高好多呀！咸菜只放一种颜色嘅渍物 (平时𠮶D系两只色) 亦都好似唔系咁有诚意！最后轮到主角鱼生饭，材料有三文鱼、八爪鱼、𫠒红鱼、赤身、甜蛋、蟹籽同埋三文鱼籽等等，中间仲有只甜虾！材料咁多，知但系好难得样样嘢都咁新鲜！只甜虾尤其弹牙鲜甜！呢个饭总算帮呢个餐攞番好多分数！当日胃口大好！叫多咗个吉列炸蚝，三大只，面包糠外皮唔太厚，蚝算系几Juicy吓。其实以鱼一丁嘅定价，应该可以做得更加好。