阿爺燒鵝餐室

营业中

休息中

是日冬至，一家人食饭加𩠌，当然要斩料啦！一直都好想试位于大围呢间「阿爷烧鹅餐室」，今日终于有机会啦！飞天头抽鸡：呢度只有半只鸡，但系估唔到望落都有成只鸡咁多啊，返到屋企时打开盒，真系满分惊喜！头抽鸡嘅烹调时间得宜，肉嫩滑之余皮又够爽，相当入味，肥膏都唔算多。霹雳火烧腩：师傅将发泡胶盒一个切口，等烧腩可以疏气，喺回家期间猪皮都仍然可以保持甘香可口。烧腩仔皮脆肉嫩，一层皮，一层肥肉一层瘦肉，食落去一啲都唔鞋身，带有点点咸香，仲有保留少少油香同埋猪香味，真系令人回味无穷。例汤：收银阿姐话今日啲汤好好饮，系花生眉豆鸡脚，话$15一碗好抵饮，叫我试㖞，见佢咁有诚意，即管试吓啦！例汤非常足料，亦都无咩味精，都算唔错。抗疫底下可以渡过一个难忘嘅冬至，真系好难得。