韓閣 (富裕樓) (已結業)

今个星期再一次出动食好西。今日就去咗荃湾“韩阁“食韩国菜 ，几次经过都见到好多人排队 ，感觉应该会唔错 。 头盘呢就可以用超低价嗌两款小食。我哋就叫咗芝士流心条$12  同埋上汤泡菜饺子$12。 芝士条新鲜热辣，芝士流晒出嚟 ，非常脆口。饺子就非常之大只。 充满著泡菜粉丝等等馅料 ，十分满足 。 食韩国嘢又点少得韩式饭卷，点咗牛肉杂菜手卷$46,一入口就充满住好香嘅麻油味 ,口感丰富。 另外我哋仲嗌咗一个 芝士杂锦部队锅 $98 ，性价比十分之高 ，有齐晒肠仔午餐肉猪肉牛肉，重点就系𠮶一兜芝士 ，非常惹味亦都十分邪恶 。 而且牛肉用过蜜糖去腌制 ，食落充斥住好香嘅花香蜜糖味，感觉几特别。我哋仲用咗优惠价追加鱿鱼圈$25， 份量十足，食极都有。 除此之外我哋仲点咗牛骨萝卜汤$108， 热辣辣送上嚟每一啖汤都有满满嘅牛肉香味，而且牛骨煮到非常松软 ，口感一流 。 整体嚟讲都非常出色 ，不比尖沙咀韩国街嘅韩国餐厅逊色。 顺带一提，觉得荃湾远嘅朋友，另外都有将军澳分店选择。