一鳴屋台料理

营业中

休息中

朋友听讲呢度嘅午餐好好食，一定要拉我去试下，好啦好啦，咁一齐试新野啦。呢度装修带有日本风，简约，木系，令我非常怀念以前去日本旅行时嘅居酒屋。仲有吧台座位，拉近厨师同食客嘅距离。午市主要拣多款日式便当或者自选拉面。日式便当配汽水或乌龙茶。自选拉面好个人化，由汤底，面条面质到配菜，都可以可以自己拣，实啱自己口味啦。今日日式便当拣左唐扬鸡配咖哩薯饼。摆盘非常精致，好靓，一黎就眼睛食先，已经觉得好满意。咖哩薯饼外脆内软，薯蓉好滑，咖喱味充满著口腔。唐扬鸡大大件，份量十足，炸粉唔算厚，鸡肉滑，仲配合有微辣芥末味嘅沙律酱，唔错。沙律菜爽甜，但对贪靓嘅女士黎讲，沙律酱就略嫌太多了。黑蒜叉烧猪软骨拉面，黑蒜油猪骨汤配黑蒜油，味道好香，味道鲜甜。猪软骨一夹就散，煮得好软稔，好入味，就算系软骨部分都一咬就开，胶感十足，好正。拉面仲有紫菜，云耳丝，增加口感。仲加钱叫左饺子，真系好满足呀。午市嘅便当同拉面都非常出色，可惜冇小食，唯有下次晚市时候再黎，试下佢嘅玉子烧，御好烧啦。