駿景軒 (已搬遷) 新店位置

都已经唔系第一次嚟到呢间米之莲餐厅。虽然地点就唔算好方便，但由于佢嘅四川菜太出色，所以点样都会嚟食嘅。今次就同两个朋友一齐食，食得辣嘅朋友即刻就叫咗胡椒虾同水煮鱼。另一位朋友做完手术唔食得辣野同海鲜，就拣咗杏汁白肺汤，蜜汁子姜鸡煲，冰梅骨，蒜蓉炒芥兰。上次来都有叫嘅胡椒虾，今次水准一样，全窝满是原粒白胡椒，一上枱已经芳香扑鼻！虾唔系好大只，所以系超级入味。呢间嘅胡椒虾系我暂时食过最好食嘅！今次一锅有七只，两个人食刚刚好！水煮鱼亦都非常出色！麻椒花椒够多够香，鱼身够肥够滑，甘香丰胦，四川辣椒够刺激，好过瘾！加埋薯粉芽菜一齐食，口感丰富。佢呢个时候就饮杏汁白肺汤舒缓下喉咙先。饮得出好足料，每一啖都有杏仁香味，猪肺煮得软淋，好饮。子姜鸡鸡肉冇雪味，煮得几嫩。冰梅骨酸酸甜甜好开胃，出奇地又煮得好淋，骨肉分离！正炒芥兰蒜蓉落得豪爽，菜炒得青绿爽脆！真系相当出色嘅中菜馆！已经同朋友约好九月再嚟。