壽司郎 (已結業)

同女朋友讲左要食寿司郎好耐，今日终于的起心肝一早去排队，我哋并冇使用网上预约，因为网上预约通常好快都会full左，我哋𠮶日大概下昼4:00就去到舖头拎飞，因为佢有网上显示排队嘅进度，所以我哋一路留意住就一路喺附近行一阵，然后去到大概下昼6:30就轮到我哋啦。so far咁样嘅话唔使留喺度等，我都觉得好快就排到我哋，亦都配合到时下嘅年青人。入到去之后，我哋被安排到去一个两人嘅吧台位，好适合情侣。然后佢枱面会有部iPad去睇Menu叫嘢食，亦都可以喺回转带上面拎嘢食，选择好多，同时佢都会有好多限定嘅嘢食，唔会一式一款，咁每次去嘅时候都会有惊喜。至于食物方面，佢嘅寿司比起其他市面上嘅连锁寿司店都要好食，而且选择都会比佢哋多，同埋一定要试佢哋嘅拖罗，因为喺香港感觉上可以食到拖罗嘅寿司店唔多，而且佢哋嘅拖罗味道都好好，绝对值得一试。同埋就算order嘅寿司上菜时间都好快，亦唔会漏单，呢方面做得好好。去到最后，我同我女朋友食咗大概20碟，埋单大概$400左右，计返$200一个头，都够食到抱住个肚走，绝对唔贵同埋值得一试！