譚仔三哥米線 (八號花園)

营业中

休息中

我本身好钟意食谭仔三哥，呢间近我屋企，而且落地玻璃够光猛，其实环境唔错。但铺入面嘅配套真系好差，忍咗大半年终于忍唔到，要出个食评，虽然写完都唔知有冇人睇到。首先呢间舒长期唔够职员，铺面好大，但永远得三个职员，已经包括落单送餐同收银，有时甚至得两个职员。餐厅个冷气坏咗大半年都冇人整，问亲职员都话冷气坏咗，净系叫客人唔好坐咁入。舖头入面净系摆咗一部冷风机，有时真系会食到出晒汗。每次落雨舖头嘅冷气机就会滴水，已经唔系一两次嘅情况，而系长期都系咁，好似都冇人谂住修理，我唔知应该系老板负责？定系业主要负责冷气机，但总要有个人去处理呢件事。每次入到去都冇职员主动埋嚟落单，就算我主动叫职员过嚟 都叫咗好耐先有人理我。落单后开始计，最少要20分钟先上到碗米线，肚饿或赶时间嘅朋友仔真系唔建议来食。呢间舖啱啱开嘅时候成日都好多人等位，但而家经过都见到大把空位，唔知系咪因为已经有太多人体验过佢地嘅送餐速度同冇冷气，越来越少人帮衬。