生記海鮮酒家

营业中

休息中

由于好耐都无去过荃湾悦来坊，所以今日我们就去咗行吓，行到一阵，我们就睇吓去边间店食嘢，最后我们就拣咗呢间「生记海鲜酒家」食下午茶！我们叫咗三式肠粉皇「牛肉肠、虾肠、叉烧肠」，平日食开嘅肠粉通常祇会有一款馅料，如果想食多几款唔同馅料嘅话，就要叫多几碟，但呢度就可以一次过满足到我们想食多几款唔同馅料嘅要求，软滑嘅肠粉，分别包著鲜嫩嘅牛肉、爽甜弹牙嘅虾肉同香甜嘅叉烧，真系好正呀！生记虾饺皇嘅饺皮好烟韧薄身，虾肉亦好爽甜弹牙，而且都几大只！田园菜苗饺嘅饺皮比较软腍，入面嘅菜苗好清甜爽脆！怀旧凤眼饺嘅饺皮相当晶莹薄身，喺爽甜嘅虾肉上面舖咗爽口嘅蟹籽，除咗令到口感更加丰富之外，卖相亦都比较吸引！鲍汁叉烧包嘅包质好香滑软熟，鲍汁嘅味道唔会过咸，而且都几惹味！怀旧腊肠卷外层嘅质感比较烟烟韧韧，腊肠嘅味道相当甘香，而且油香渗透晒入包入面，真系好正呀！