三姐廚房私房菜 (已結業)

成日都话工厦卧虎藏龙，又一次证实！今次试喺观塘地铁附近嘅三姐私房菜，未试过私房菜都知系好野，起码用料一定有诚意。头盘系有机沙津菜同流心蛋，沙津菜大大盘竟然都食得晒，而流心蛋系经过茶熏，伴上黑鱼子同茄子，出奇咁夹！跟住位位一盅足料炖汤，我嘅系人参石斛螺头汤，听材料都够架势。饮落都真系好足料，人参味甘而不苦，加上有咬口嘅石斛，正。私房菜又岂可不食海鲜呢？叫咗条海班两食，先系黑松露炒班球，班球鲜嫩滑口，松露味都好香。另一味就系焖头腩，都几滑不过多骨咗少少。又嚟三葱鲍鱼，爆到香一香，鲍鱼一啲都唔韧！黄金私房大肉蟹，冇改错名，真系啖啖肉大大只！捞饭一流陈皮骨炸得松脆，真系好有陈皮味，闻落同食落都好甘香！仲有个水耕菜苗冇影，鱼汤浸上，作为晚餐嘅句号啱啱好。