逸東軒

早排试左呢间拎过米芝莲一星嘅酒楼，虽然假日无$38优惠，但都一早爆满，即日book要到下午茶时间先有位。由于系酒店餐厅，装修都几有气派，枱与枱之间够晒宽阔，坐得好舒服，茶壶座内有蜡烛keep住加热，呢点抵赞。 🍽明炉蜜汁叉烧好多人推荐呢度嘅叉烧，价钱唔平但份量几多，旧旧厚切，半肥瘦，边位烧到焦脆，肉质松化，果然名不虚传，不过有几旧都几多筋。🍽春风得意脆皮肠粉肠粉皮晶莹透薄，夹起时唔会出现甩皮甩骨嘅情况，春卷摆左一阵仲脆，包住爽口大虾，好食。 🍽XO酱炒萝卜糕整法同椒盐豆腐有d似，萝卜糕细细粒好易入口，略嫌XO酱唔够味。 🍽带子蒸烧卖猪肉烧卖加埋带子啖啖肉，用料新鲜。 🍽鲍汁鲜竹卷个酱汁太杰，馅料偏少，呢个麻麻地。🍽黄耳上素粉果薄薄嘅外皮包住黄耳、香菇同沙葛粒，清甜爽口。🍽蜂巢海鲜芋角整芋角好考功夫，而家唔系间间酒楼都做。呢度嘅蜂巢外层炸得酥脆，芋泥馅满满，而且质地幼滑，唔错。🍽虾酱牛崧炒饭(唔记得影添）虽然虾酱味唔太明显，但个饭底真系做到粒粒分明，连腌尖嘅阿爸都赞不绝口。