影片
更多
2012-09-07
538 浏览
好耐之前都嚟过利景酒店嘅逸亭餐厅食自助晚餐，原来已经喺5年前嘅事（http://www.openrice.com/restaurant/commentdetail.htm?commentid=1867234），𠮶时都知佢有间酒吧晌地库，不过甚少落吧嘅我，未有再深究其中。机缘之下，今日终有机会一试，并且顺道帮老友兼旧同学Eva贺佢牛一，又再顺手预祝埋小弟老婆生日，不过佢正日已经订咗枱食饭，今晚只喺趁人多高兴啲嚟贺埋一份。Champs Bar，原来有个中文名字：蒲点美式酒吧，格局跟一般酒吧无异，周围安装咗好多部平面大电视，又有巨型投影银幕，不断播放各种运动赛事，当然唔少得直播英超啦。此外，座位嘅安排比较阔落，感觉宽敞舒适，但更能吸引我双眼球喺墙身嘅挂饰，好多利物浦唔同年代嘅球衫，仲有一张海报印咗好多利物浦嘅典堂球员：杜格利殊、鲁殊、奇云基谨……，哗！简直称得上利记球迷嘅饭堂啦。先申报个人利益，小弟虽然喺曼联死硬粉丝，但对依班典堂球员一样带有一份敬重，因为佢哋真喺好波丫嘛。除咗睇波，餐厅内仲有电子飞镖机，又可以享用无线宽频上吓网，所以唔睇波都啱嚟。入门口时，见佢有个推广：「欢乐时光饮品买一送
Champs Bar，原来有个中文名字：蒲点美式酒吧，格局跟一般酒吧无异，周围安装咗好多部平面大电视，又有巨型投影银幕，不断播放各种运动赛事，当然唔少得直播英超啦。此外，座位嘅安排比较阔落，感觉宽敞舒适，但更能吸引我双眼球喺墙身嘅挂饰，好多利物浦唔同年代嘅球衫，仲有一张海报印咗好多利物浦嘅典堂球员：杜格利殊、鲁殊、奇云基谨……，哗！简直称得上利记球迷嘅饭堂啦。先申报个人利益，小弟虽然喺曼联死硬粉丝，但对依班典堂球员一样带有一份敬重，因为佢哋真喺好波丫嘛。除咗睇波，餐厅内仲有电子飞镖机，又可以享用无线宽频上吓网，所以唔睇波都啱嚟。
入门口时，见佢有个推广：「欢乐时光饮品买一送一」，而且依度饮品选择有几多，果汁、非酒精类特饮Mocktail、Cider、Beer、Classic Cocktail、Special Cocktail、Wine、Whisky、Brandy、Vodka、Rum、Gin、Tequila……等等，而且，欢乐时光由5:00-9:00pm，比一般去到8:00pm嘅欢乐时光长多一个钟，所以，食埋饭都喺个唔错嘅配搭。不过，有少少温馨提示，唔喺样样都买一送一，有少部分饮品就无依个优惠，例如部份Classic Cocktail、全部Special Cocktail同Wine……等，到时留意一下个饮品餐牌你就见。此外，HSBC / 恒生信用卡仲有9折，真喺可以一悭再悭！
贺生日就自不然无理咁多，各自拣选心水饮品。Manhattan $60
属于经典嘅鸡尾酒系列，成份有Bourbon威士忌、Sweet Vermouth苦艾酒同Bitters，几只酒沟埋，无其他喇，唔好睇佢细细杯，小弟唔喺好酒之人，入口都觉得几「哽」吓。
Long Beach Iced Tea $72
老婆都几大胆，竟然拣只仲多酒沟埋嘅鸡尾酒，又有Gin、Vodka、Rum同Triple Sec，只只酒精度都唔低架。不过咁，再加埋Cranberry Juice、7-Up，色泽真喺似杯冻茶，而饮落又无想像中咁劲，但喺，佢饮到半杯后都已经话有少少醉意㖞！
Cozy Eyes $62
咁多杯之中，依杯卖相就最靓，以Tequila、Triple Sec、Blue Curacao、Lemon同Pineapple Juice所打成碧蓝色嘅鸡尾酒，高身酒杯载住，杯面一撮白泡加片薄荷叶，色泽诱人。味道喺点？卖个关子，但据试饮者话令人饮得惬意！
Lychee-tini $62
好有一个传统鸡尾酒样子嘅感觉，黄色嘅外表源于加入咗菠萝汁，仲有Vodka、Lychee Liqueur、Crème de Banane，后者两款利口酒带有荔枝同香蕉甜味。因为酒名以荔枝挂帅，但饮落其实荔枝味又无想像中咁出。
听餐厅讲，迟啲仲会推出一系列Signature Drink，暂时未有详情，不过都喺一啲鸡尾酒，好此道嘅朋友值得留意一下，最希望梗喺都晌「欢乐时光买一送一」之列啦，哈哈！老友相聚，边饮边食自然喺开心事。因为Champs Bar不单喺间酒吧，亦喺一间美式餐厅，故此食物种类真不少。由沙律、汤、头盆小食、三文治汉堡、薄饼……以至于意粉、多款主菜及甜品都有供应。餐牌细细印咗50多款美食，可能你会略嫌觉得难睇，感觉花多眼乱，但有个简单做法，就喺试吓佢哋嘅「10大招牌美食」（Top 10 Signature Dishes），当中已包括唔同类型嘅食物。又或者向侍应查询，因为佢哋手持ipad，有晒食物图片，等你一目了然有样睇。
蒲点拼盘（Combo Plate）$168虽然佢唔喺店内嘅10大招牌美食，但绝对喺我哋今晚最钟意嘅一道美食，极之值得推介。侍应捧过嚟上枱时我哋已经即刻起哄，哗哗声四起，因为成个拼盘好大份，甚有睇头，小食款式又多，包括：焗薯皮、炸鸡柳、水牛城鸡翼、洋葱圈及墨西哥粟米片，并伴有3款酱汁：酸忌廉、蜜糖芥茉酱、墨西哥辣酱。焗薯皮焗得够透，质感粉软，配上车打芝士、烟肉同香葱，非常滋味；炸鸡柳，出奇地嫩㖞，炸得外层香脆又大大件，食得过瘾，依个蘸蜜糖芥茉酱就最正，芥茉味浓带蜜糖香，质感柔滑，亦系我哋几个最欣赏嘅酱汁；以辣见称嘅水牛城鸡翼，喺经典嘅美式小食，不过今次所见就唔喺用上鸡中翼部份，而喺用咗半截鸡中翼连埋翼尖，而且无乜辣劲，但最窝心喺鸡中翼部份已经去晒骨，啖啖肉方便食；炸洋葱圈亦都睇到厨师嘅心思，个个洋葱圈都颇大圈，表示大厨用上一个洋葱较外环嚟做，卖相好睇好多，配酸忌廉就最合拍，只喺觉得粉浆有少少厚，但其实已经炸得颇出色，因为无乜油淋淋嘅油腻感；最后嘅墨西哥粟米片，份量上相对多，为添味道层次，仲加咗青辣椒碎、蕃茄粒、黑橄榄、葱粒，点酸忌廉或墨西哥辣酱都好食，后者酸酸辣辣，十分醒胃，原来食到下一朕粟米片，仲加咗啲肉酱，味道非常丰富。所以，依个拼盘非常抵食，学Ivan兄话斋，三几个老友记，一人一杯啤，加埋依个蒲点拼盘，已经够坐一晚啦！
碳烧美国排骨（BBQ Baby Back Ribs）$118（半份）、$168（全份）烧猪肋骨又喺好多美式餐厅嘅招牌菜，依度都唔例外，分半份同全份，侍应Kenny强烈推介我哋点全份，话好抵食，不过我哋又想试多啲嘢，半份啱啲。半份有6条骨，烧得好香，伴碟有少许沙律菜、酸椰菜、脆薯条，并跟自家制蜜糖烧汁。比起Ruby Tuesday、Tony Roma，依度嘅烧猪肋骨肉质方面较为挺实啲，无咁松散，而以烧汁慢烤，汁酱入肉三分好入味，唔蘸蜜糖烧汁都已经好OK，另外难得肉汁仍保持丰盈。虽然配菜一般嚟讲喺点缀，但都唔马虎，酸椰菜丝酸酸甜，几爽脆；至于薯条，比起麦记嘅大成个呎码，炸得金黄，食落外脆内软，加上份量颇多，点啲蜜糖烧汁就更惹味。果然喺店内嘅10大招牌美食之一，又一值得推荐菜式！
美国安格斯肉眼扒（U.S. Angus Rib Eye Steak）$218对比起上面个碳烧美国排骨，依道肉眼扒就有啲失色。足有12安士嘅肉眼扒，厚身大块，烧得蛮香，伴有多种蔬菜（珍珠笋、车厘茄、西兰花、香菇）同原个焗薯。点解话个肉眼有啲失色？一来我哋要五乘熟，但切开所见近乎全熟，只喺有少部份仍带粉红，口感虽不至嚡口，但少咗份香嫩，还好喺肉味甚浓；另一方面，伴菜同焗薯未见有咩特色，只喺作为平衡一道主菜嘅角色。反而惊喜位竟然喺啲香草牛油，啡黄色嘅香草牛油，闻落无乜嘢，但涂落啲肉眼扒度，嗒出草香油润。
百里香烧银鳕鱼柳（Grilled Black Cod Fish with Fennel and Fresh Thyme）$188唯一一款鱼类嘅主菜，银鳕鱼柳伴以鲜百里香同茴香用烧烤方式处理，鱼柳隐约带点香气，最正喺鱼肉油香满溢又滑溜，虽然件头细，但好滋味。跟肉眼一样，伴碟有多种蔬菜及原个焗薯，因为上面都食咗好多薯仔嘢，又焗薯皮，又薯条，所以啲焗薯有少少被我哋冷落，反而今餐无点沙律，食番多少少蔬菜均衡一下。
蟹肉天使面（Drunk Angel）$88餐牌中有7款意粉类：千层面、长通粉、蝴蝶粉……，以一间酒吧餐厅嚟讲都算喺多。我哋就专灯挑天使面嚟试，因为依个属于难煮得好嘅一款意大利面。卖相平平无奇，但味道都几突出，忌廉汁都几多，丝丝天使面都挂满酱汁，味道带点甜，有人估佢加咗一啲甜酒，细问之下原来个忌廉汁加入咗龙舌兰酒（Tequila），再配上蟹肉，撒上安文达芝士粉（Emmental），比巴马臣浓香。论到个面嘅焦点—质感，其他人觉得OK，小弟就稍稍觉得过咗个分界位少少，面质幼滑但有啲腍；我最怕喺食到「一PatPat」烂糊糊嘅天使面，好似食糊仔咁，幸好眼前依碟都仲未喺咁，因为天使面太幼，真喺好易煮过笼。既然个天使面都煮得唔差，相信其他意大利面都有一定水准，尤其是酱汁部份。
特式甜品拼盘（Special Dessert Platter）$78本来大家够晒皮，都无打算食甜品，但尝过美酒佳肴，唔食少少甜品好似若有所失。小弟心水原本喺特级朱古力软心蛋糕同个焗苹果金宝，前者怕等得耐，后者有反对声音，所以就拣个大包围－特式甜品拼盘，样样有唔使烦，亦问过侍应，唔会太大份，就咁扑锤试依个啦。以一只大长碟盛载著8件甜品，共4款每款两件，都喺的的骰骰，整个甜品拼盘卖相亦花咗啲心思，一边碟尾打咗啲芒果酱，放咗蓝啤梨、士多啤梨同龙珠果做装饰，碟中又洒低点点开心果仁碎，睇起嚟感觉无咁单调。等小弟逐款甜品评吓先：
意大利芝士饼－底下用咗朱古力海绵蛋糕，但中间依然正统用上手指饼。手指饼有咖啡香，但似乎酒味欠奉，而马加风芝士打得幼滑，配合面层嘅唂咕粉，味道OK。
德国芝士饼－芝士跟海绵蛋糕相间，无用消化饼底，感觉轻盈啲，但芝士味依照十足。
芒果慕丝蛋糕－芒果慕丝跟海绵蛋糕相间，再晌饼面做一层芒果果酱，慕丝都算柔滑，但芒果味唔算好强劲。
木糠布甸－我就觉得炼奶忌廉个质感几好，但友人就嫌佢化得滞，太流质，仲有就喺大家都认为奶味太重，可以减番少少就更好。
甜品整体唔算好高质，佢始终主打唔喺甜品，但都算中规中矩唔失礼！
整晚服务几贴身到位，值得一赞。如果无记错，招呼过我哋侍应嘅名字喺Kenny同Yuki，佢哋不时都会过一过嚟睇吓我哋有咩需要，帮手收一收碗碟，食甜品时又换过晒所有碟同叉，同埋时刻保持笑容对客人嚟讲都好重要。今晚客人唔太多，可能客多嘅时候先喺真正考验。仲有就喺一入嚟所遇到个经理阿Rex，佢知我哋唔喺斋饮酒，喺食埋晚餐，就建议我哋由卡位转去六人枱方宽敞啲，方便摆嘢食，因为美式食物碟头始终都颇大件。不经不觉讲吓食吓，食吓又饮吓，餐饭食咗成三粒钟，但大家都好享受，因为彼此啱倾，啲嘢啱食，主题所指嘅「美馔」，当然喺指美式食物，更喺指美味佳肴。好友住晌太子，佢屋企附近都有好多酒吧，不过佢就唔喺咁钟意𠮶类，太嘈太杂，Champs Bar佢话会喺跟班好酒老友嘅聚脚新点！我就见佢有个「Mix & Match半自助午餐」，自助头盘、甜品，主菜6拣1，包茶啡，冻茶任饮，都喺卖$108，日日都都有供应，最好喺信用卡优惠照有，仲加个8送1优惠（储印仔形式），虽未知质素如何，但都几有兴趣想试㖞！
题外话/补充资料：
餐厅网址：http://www.champsbar.com.hk/chi/index.php
里面有埋餐牌、饮品名单及价钱，去之前睇睇可以有个预算！
(以上食记乃用户个人意见 , 并不代表OpenRice之观点。)
张贴
