屋台屋 (已結業)

今晚点左：-蚬肉面豉汤乌冬+牛舌煎蛋饭-葱吞拿鱼腩卷-牛肋骨山贼烧-葱油酱油拉面首先讲讲环境，地方宽敞，但枱面痴笠笠。店内无咩人，店员比顾客还多。先黎一个强制性前菜（需收费），系你同我都可以喺小食店买到嘅螺肉，$18蚊得几粒，普通茶亦另外收钱。蚬肉面豉汤乌冬嘅汤系味精、蚬肉内脏未清，仲有沙添，乌冬系超市货色。牛舌煎蛋饭，系成个茶餐厅格局出晒黎，牛舌劲有𡁻口，每粒牛舌都𡁻到崩溃，牛舌本身就无乜调味。葱吞拿鱼腩卷算全餐饭最正常嘅食物，无惊便算喜。当我以为牙胶可以休息一下嘅时候，我另外要花158蚊再挑战面部肌肉嘅极限，牛肋骨山贼烧𡁻到我嘴都歪，外面煎至全黑，里面偏熟。葱油酱油拉面黎讲，食唔到葱香酱油香，拉面淋到一个点，完全无𡁻口。啱嘅，厨师知道我头先𡁻得太辛苦，所以其实好体贴。成个拉面仲落左几滴港式嘅辣椒油，令我有彷如置身茶餐厅嘅感觉。埋单总共$517，完全系浪费金钱嘅好选择。