千房 (已結業)

无订位，唯有攞飞等位。2个人等左半个钟多啲，Receptionist已经系入座前讲清楚，落单之后要等30分钟，食用时间系90分钟，计落得1小时左右食嘢。坐好，快快落单先，叫左芝味广岛烧，我同朋友都估究竟系煮好上枱定系要自己动手。原来系煮好左，热辣辣，芝士融化伴上炒面猪肉同菜丝，酱料随自己喜好落多落少。最初唔明白既然已经煮好，点解仲要放系铁板上，原来可以保持芝士食到尾都系融融地。蒜香烤虾肉质结实，蒜味浓郁，好好味，可惜得4只。呢个蒜香牛油杂菌，一般。香脆铁板饺子真系好脆，饺子饀有点咸，连埋脆皮一㗳咬落去就刚好。其实落单之后要半个钟对香港人黎讲有啲耐，但系见厨师密密手密密手咁整无停过，又真系唔系几好意思催，隔离枱既情侣或者一班朋友聚会既，都好有耐性咁倾住计等。我同朋友就叫嘢饮吹住水等。侍应未系好熟手，好多嘢要提，例如换碟，上嘢饮，但系佢哋都好有礼貌讲唔好意思。座位唔会太迫，啱有时间慢慢倾计食饭hea一晚。