十十川滬料理 (已結業)

同老公行朗豪坊行到攰攰地，去到美食广场，见到有间食川沪菜餐厅，好似几好，所以就拣左佢食晚饭。餐厅虽然食中式，但装修比较西式，吹简约风。灯光光猛，环境干净整齐，感觉舒服。餐牌都几多嘢食，老公就点左前菜、小笼包、炒饭、咸点同甜品。鸡丝粉皮：老公话份量算多，粉皮烟韧，青瓜爽口，配中式麻酱味道较浓，呢个前菜都几好食。什锦小笼包：四只颜色，四款口味。红色系香辣味，辣辣地；绿色嘅系酸菜鱼，味道真系酸菜鱼味㖞；白色真系原味，鲜肉味重；黄色系金黄流沙，好香咸蛋黄；各款有创意同特色，出面未食过。十十海鲜炒饭：里面有蟹柳，墨鱼仔同河虾。河虾爽口，墨鱼仔烟韧口感，炒饭炒到粒粒分明，唔会食到满口油，加埋鸡蛋炒好香，整体唔错。迷你香脆葱油饼：入口仲系热，咬落去外面脆，口感实在，淡淡葱味，又唔觉得好多油，几饱肚。酥皮凤梨奶黄锅饼：一般食开红豆味，但呢度用凤梨奶黄做配料，几创新，亦估到味道几好。凤梨奶黄味重，甜甜地又唔会话好甜，外层脆，里面软软，食埋佢就满足晒。