鳥語 (已結業)

聖誕節就到，梗係要食聖誕大餐先有氣氛。位於厚福街嘅【鳥語】推出嘅XMAS Dinner，喺IG見到賣相都幾靚，仲有6款主菜揀，款款都幾吸引，一於去試吓～先送上係兩杯熱飲，兩杯都有棉花糖公仔喺上面，造型可愛又有冬日氣氛。【薑餅人拿鐵】咖啡味香淳，仲有淡淡薑味，幾特別。【蔓越莓爆炸糖朱古力】香濃朱古力味，暖身又暖心，入面係有爆炸糖，不過比較少所以只feel到少少口感。【鮮蝦藜麥牛油果沙律】口感好豐富喺一道前菜，鮮蝦大隻又爽口，藜麥混和牛油香就軟綿中帶軟糯Q彈。【香煎帶子配芒果沙沙】芒果嘅甜味仲煎香咗嘅帶子又幾夾，芒果嘅鮮甜亦帶出帶子嘅鮮味，好好嘅一個配搭。【自家手作龍蝦湯】香濃龍蝦湯，口感creamy，龍蝦肉都幾多，好想encore飲多碗～【銀雪魚柳配藏紅花汁】銀雪魚柳肉色雪白，肉質嫩滑多汁；藏紅花汁食落有少少牛油香味，同鮮甜魚肉好夾。配菜有白露筍，比起常見嘅青露荀更加清爽多汁、鮮甜脆口。【原片黑松露雜菌雪糕意粉】成個雪糕cone打斜倒插入意粉，幾有藝術感覺。入面嘅「雪糕」其實係忌廉芝士，撈埋意粉食口感會更creamy，仲多咗啖啖芝士味；黑松露係原片咁落，食落味道更加香濃。