品曲奇 (利園二期) (已搬遷) 新店位置

作为一个甜味怪，但凡系甜食，基本冇嘢我系唔钟意食嘅，曲奇当然唔会例外。单睇外包装都真系几精美新颖，四四方方一个盒，好难联想到系曲奇。打开一睇，八款唔同口味嘅曲奇齐齐整整摆喺四格里面，等紧我嚟试真佢哋。陈皮子姜味系我嘅飞佛，一打开就闻到淡淡嘅陈皮香味，食落又有啲酸酸甜甜嘅口感，忍唔住食多块。杏脯迷迭香。虽然我都好钟意食果脯之类嘅零食，不过呢只味就有啲普通，食落有啲烟韧，淡淡嘅香味，不过不失。葱油鸡。好特别嘅味道，浓浓嘅葱油香味，食落冇想象中果种又咸又甜不伦不类嘅突兀感，反而有种中西合璧恰到好处嘅感觉。红枣味。浓郁嘅红枣香甜味，众多味之中最烟韧嘅口感。提子花旗参。食落就普通酥脆嘅曲奇，间中有粒提子点缀下口感，但嗒真啲就会有花旗参果种甘甘哋嘅味道。香辣虾米。就咁睇样已经好特别，真系有粒虾米喺件曲奇上面。食落咸甜味平分秋色，好香口但唔太辣，创意满分。XO酱。XO酱本身嘅味道浓郁，鲜中带辣，同曲奇嘅牛油香同酥脆口感碰撞，值得一试。七味粉。味道偏辣，我唔系太食得辣，感觉只系食到辣味而食唔出其他味道。