林記涼茶店 (已結業)

南丫岛系本地人假期行山嘅热门地点之一，逢假日，就逼满人，相反，其他日子，就显得水静鹅飞。话晒小弟都晌里面生活咗成5年，平日除咗返放工嘅时段外，其余时间都静绳绳。老实讲，住就非常好住，但交通始终有啲唔方便，买嘢又系选择有限。行山行到累自不然要休息吓，行到口渴嘅，除咗阿婆豆腐花之外，其实林记凉茶店都系一个值得推介嘅选择，与其晌士多买水饮，不如晌林记买支健康自家制嘅凉茶。一共有成16款凉茶之多，大路又常见嘅，有酸梅汤、夏枯草、银菊露、五花茶……等等，较特吃少见嘅，有雪梨雪耳枇杷叶、罗汉果枇杷叶桔饼、鸡骨草搭金钱草……等等，几年嚟都无乜转过款，当然价钱有别啦。各样饮品写晒有咩功效，如：清湿热、消暑、化痰、解毒、祛肝火、生津止渴，真系各式其式。苹果桂花茶 $13功效包括养颜、健脾、开胃、消口气，有无咁灵，真系饮一支相信都唔系话咁快见效，但色泽金黄嘅苹果桂花茶，饮落感觉几柔和，桂花味唔系好重，苹果味比较侧重啲，整体会系幽幽香咁，况且属于少甜，更觉健康！