趣苑茶餐廳 (已結業)

依间向来系炒嘢同焗嘢得，其他都唔掂，做早、午，下午茶，夜晚主力做甜品，同隔离同一个老细，所以嘢食可以两边叫，下午茶由八点半加到十点半，再减到六点，可以话过山车之年。改早之后就无食过，原来餐牌都有调整，首先全部加哂价，仲系几蚊，一般下午茶系抵啲，但之前试过午餐差几蚊多碟油菜，宜家无咗反而合理。未够六点，佢都只做外卖，以前明明睇时间落单，慢慢食坐到几点都得，佢又唔关门。午餐芝士焗鸡扒饭，照样即焗，睇落靓仔，比以前下午茶多，芝士无写我以为会配白汁，原来唔系，两旧蕃茄，大量杂粒，一般芝士量，鸡扒煎香，较大块，炒饭底，但汁只有鸡扒间过少少，成兜饭基本系无汁！依间之所以得炒嘢同焗嘢得，就系因为佢啲饭长期煮到好似隔夜饭梗，所以炒完刚刚好，但今次个饭干焗完就好似放多晚加热，又硬又干，炒饭底得少量蛋无调味，系杂粒有啲湿度，每囗都系杂粒味加干干的硬饭，食完胃都痛！焗饭最紧要个汁，你够汁我唔理你个饭炒咗几耐，唔理你块扒有雪藏味，只要个汁掂全部都覆盖到！你无汁就算个量几多，块扒煎得几好都无用！边个仲同我讲过几间快餐店嘅焗饭难食？你同我食过依间先讲！