芝加哥串燒 (美豐花園) (已結業)

世界杯相约好友齐齐睇波, 朋友介绍呢间小小串烧店。虽然餐厅唔大, 但座位编排唔算会太密, 坐得舒适。店内装修摆设好有格调, 尽显店主品味。食物方面选择多之余, 价钱一啲都唔贵, 性价比极高！睇扇贝肉同壳嘅比例就知道, 贝肉并无因为烧熟而缩少, 食落肉嫩而且厚身, 配上适量香蒜葱花, 提味不少, 绝对系必点之选。大大只烧茄子, 茄肉烧到软绵绵, 洒上孜然粉同葱花, 风味十足。肥牛同金菇一向系最佳组合, 牛油融入爽嫩嘅金菇, 口感一流, 绝对不能错过！两款口味嘅烧蚝, 肉嫩多汁, 上枱时热度十足, 芝士味浓郁惹味, 香蒜葱花味调味恰到好处, 好味到连汁都要饮埋呀。羊肉软滑多汁, 膻味都几浓, 我个人对羊膻味非常受落, 啱晒我口味呀。无骨鸡翼, 包著辣辣地嘅糯米饭, 口感独特, 值得一试。韮菜爽甜, 经调味后更加美味。呢块rib, 份量之大, 绝不欺场, 无返3,4个男人都食唔晒。切开啖啖肉, 肉质比较扎实, 不太入味, 不过不失。今餐坐足两个钟, 一次过满足晒, 吃、喝、睇波、倾计, 畅快至极, 以后又多个聚脚点啦。